Mirë se erdhët në faqen e internetit të Robert Elsie: shkrimtar, përkthyes,
interpret dhe albanolog. Këtu do të gjeni informacion jo vetëm për Robert
Elsie-n, por në veçanti, tërë botimet e autorit: libra, artikuj shkencore, reçensa
dhe intervista nga viti 1975 deri me sot. Teksti i plotë i shumë librave, dhe të
shumicës së artikujve shkencore, të reçensave dhe të intervistave mund të
shkarkohen këtu nga interneti në formatin PDF.
Robert Elsie merret me albanologjinë prej më shumë se tridhjetë viteve,
veçanërisht me kulturën, letërsinë dhe historinë e shqiptarëve.
Faqja e internetit „Arti Shqiptar“ i kushtohet artit e popullit shqiptar në
kuptimin e gjerë, d.m.th. u kushtohet përpjekjeve të ndryshme artistike të
shqiptarëve apo veprave që kanë një lidhje me Shqipërinë apo me shqiptarët.
Ajo nuk pretendon të japë një histori të plotë të artit shqiptar, vetëm t’ia
paraqesë lexuesit/shikuesit ndërkombëtar disa aspekte dhe dukuri që mund të
kenë interes për të.
Faqja e internetit „Tekste dhe Dokumenta të Historisë Shqiptare“ ofron një
përmbledhje tekstesh që synon të hedhë më shumë dritë mbi këtë kënd të
Evropës Juglindore i cili shpeshherë keqkuptohet nga historianët dhe
shkencëtarët. Kjo faqe nuk është një histori e Shqipërise dhe as një histori e
shqiptarëve, por thjesht një përmbledhje tekstesh historike - nga shekulli i
njëmbëdhjetë deri një shekullin e njëzetenjë - të cilat do të shërbejnë për të
kuptuar më mirë historinë dhe zhvillimin e Shqipërisë dhe të popullit të saj.
Shumë prej këtyre teksteve paraqiten këtu në përkthim, kryesisht në anglisht,
për herë të parë.
Faqja e internetit „Gjuha Shqipe“ ofron një hyrje mbi gjuhën shqipe me disa
inçizime historike. Në pjesën „Dialekte Shqiptare“ mysafiri mund të dëgjojë të
folmet rajonale të shqipes, pra se si flitet gjuha shqipe në krahinat e ndryshme
të botës shqipfolëse.
Faqja e internetit „Letërsia Shqiptare Anglisht“ përmban përmbledhjen më të
madhe të letërsisë shqiptare në gjuhën angleze. Ajo perfshin një varg tekstesh
nga e kaluara si dhe shumë autorë bashkëkohorë nga Shqipëria, Kosova dhe
nga diaspora shqiptare, si dhe disa tekte të letërsisë gojore. Disa përkthime janë
botuar gjatë viteve, por shumica shfaqen këtu për herë të parë.
Faqja e internetit „Fotografia e hershme në Shqipëri“ ia ofron shikuesit disa
koleksione të hershme fotografike, kryesisht nga fundi i shekullit të
nëntëmbëdhjetë dhe fillimi i shekullit të njëzetë. Këto koleksione, deri tani
kryesisht të panjohura, janë mjaft domëthënëse për të kaluarën e popullit
shqiptar dhe do të jenë objekte, shpresoj unë, të një interesi të veçantë.
Ju uroj lexim të këndshëm.
Robert Elsie
Tekstet e artikujve dhe të librave të dhënë në dispozicion këtu mund të shfrytëzohen privatisht
nëse përmenden autori dhe burimi. Çdo shfrytëzim komercial kërkon paraprakisht lejën e autorit.
Falemnderit. | Robert Elsie
Webdesign 1998 — 2019
Josef Gross , Germany